धाराशिव (अधिकार वार्ता प्रतिनिधी): धाराशिव जिल्ह्याच्या राजकारणात आज एका मोठ्या घडामोडीने सर्वांचे लक्ष वेधून घेतले आहे. भारतीय जनता पार्टी माथाडी ट्रान्सपोर्ट आणि सुरक्षारक्षक जनरल कामगार युनियनचे (महाराष्ट्र राज्य) खंबीर नेतृत्व सुनील बनसोडे यांनी आज जिल्हा परिषद निवडणुकीसाठी भाजपच्या वतीने आपला उमेदवारी अर्ज अत्यंत उत्साहात दाखल केला. त्यांच्या या निर्णयामुळे जिल्ह्याच्या राजकीय समीकरणांत मोठी खळबळ उडाली आहे.
कामगारांचा ‘मसिहा’ आता निवडणूक रिंगणात!
सुनील बनसोडे हे केवळ राजकीय नाव नसून, माथाडी आणि सुरक्षारक्षक कामगारांच्या हक्कासाठी लढणारे एक आक्रमक नेतृत्व म्हणून ओळखले जातात. गेल्या अनेक वर्षांपासून ‘भारतीय जनता पार्टी माथाडी ट्रान्सपोर्ट आणि सुरक्षारक्षक जनरल कामगार युनियन’च्या माध्यमातून त्यांनी राज्यभरातील हजारो कामगारांना न्याय मिळवून दिला आहे. राजकारणाची नाडी ओळखून समाजकारणात पाय घट्ट रोवलेल्या बनसोडे यांनी आता जिल्हा परिषदेच्या माध्यमातून ग्रामीण भागाचा कायापालट करण्याचा निर्धार केला आहे.
भाजपची मोठी खेळी!
धाराशिव जिल्हा परिषदेवर भाजपचे वर्चस्व निर्माण करण्यासाठी पक्षाने बनसोडे यांच्यासारख्या अनुभवी आणि जनसंपर्क असलेल्या नेत्याला मैदानात उतरवले आहे. अर्ज दाखल करताना कार्यकर्त्यांचा मोठा फौजफाटा आणि घोषणाबाजीने परिसर दणाणून गेला होता. “सर्वसामान्य जनतेचा विकास आणि कामगारांचे प्रश्न मार्गी लावणे हेच माझे मुख्य ध्येय आहे,” असा विश्वास सुनील बनसोडे यांनी यावेळी व्यक्त केला.
विरोधकांच्या गोटात अस्वस्थता
बनसोडे यांच्या उमेदवारीमुळे विरोधकांसमोर मोठे आव्हान उभे राहिले आहे. कामगार वर्गाची मोठी ताकद आणि भाजपची संघटनात्मक शक्ती यांच्या जोरावर सुनील बनसोडे ही निवडणूक एकतर्फी झुकवणार का? याकडे आता संपूर्ण जिल्ह्याचे लक्ष लागले आहे.धाराशिवच्या विकासासाठी आणि जनतेच्या सेवेसाठी सुनील बनसोडे यांचा हा ‘दणदणीत’ प्रवेश आगामी काळात काय चमत्कार घडवतो, हे पाहणे औत्सुक्याचे ठरेल.