“अनुसूचित जातीसाठी आरक्षण आहे म्हणून मी उभा नाही राहिलो; तर माझ्या गटाच्या विकासासाठी व जनतेला त्यांचे हक्क, न्याय मिळवून देण्यासाठी या रिंगणात उतरलो आहे.”
काक्रंबा, तुळजापूर (अधिकार वार्ता प्रतिनिधी): आगामी जिल्हा परिषद निवडणुकीच्या रणधुमाळीत काक्रंबा गटातून वंचित बहुजन आघाडीचे अधिकृत उमेदवार म्हणून मिलिंद रोकडे यांनी आपला उमेदवारी अर्ज मोठ्या उत्साहात दाखल केला आहे. अर्ज भरल्यानंतर माध्यमांशी बोलताना त्यांनी सत्ताधारी आणि विरोधक दोघांवरही सडकून टीका केली असून, प्रामुख्याने ग्रामीण भागातील शिक्षण आणि आरोग्य व्यवस्थेच्या दुरवस्थेवर बोट ठेवले आहे.
शाळांच्या दुरवस्थेवर चिंता: मिलिंद रोकडे यांनी आपल्या भाषणात जिल्हा परिषद शाळांच्या ढासळत्या स्थितीवर तीव्र नाराजी व्यक्त केली. “आज ग्रामीण भागातील गोरगरीब मुलांच्या शिक्षणाचे आधार असलेल्या जिल्हा परिषद शाळा बंद पडण्याच्या मार्गावर आल्या आहेत. इमारतींची पडझड झाली आहे आणि आवश्यक शिक्षक उपलब्ध नाहीत. प्रस्थापितांनी स्वतःच्या खाजगी शाळांचे इमले उभे केले, पण गरिबांच्या लेकरांना शिक्षणापासून वंचित ठेवण्याचे पाप केले आहे,” असा आरोप त्यांनी केला.
आरोग्य सुविधांचा अभाव: आरोग्य विभागाच्या मुद्द्यावर बोलताना रोकडे म्हणाले की, प्राथमिक आरोग्य केंद्रांमध्ये ना डॉक्टर वेळेवर उपलब्ध आहेत, ना आवश्यक औषधे. आपत्कालीन परिस्थितीत ग्रामीण जनतेला शहराकडे धाव घ्यावी लागते, यात अनेकांचे प्राण जातात. आरोग्य खात्यात उपयुक्त सुविधा निर्माण करण्यात लोकप्रतिनिधी पूर्णपणे अपयशी ठरल्याचा टोला त्यांनी लगावला.
विरोधकांना टोमणे: मिलिंद रोकडे यांनी विरोधकांचा समाचार घेताना म्हटले की, “निवडणुका जवळ आल्या की विरोधकांना गावातील रस्त्यांची आणि लोकांच्या प्रश्नांची आठवण होते. पाच वर्षे सत्तेत असताना ज्यांना शाळा आणि दवाखाने दिसले नाहीत, ते आता कोणत्या तोंडाने मते मागणार? ” त्यांनी जनतेला आवाहन केले की, जाती-पातीच्या राजकारणापेक्षा विकासाला आणि मूलभूत सुविधांना महत्त्व देणाऱ्या वंचित बहुजन आघाडीला संधी द्यावी.
मिलिंद रोकडे यांच्या या भूमिकेमुळे काक्रंबा गटातील राजकारण अधिक तापले असून, शिक्षण आणि आरोग्याचे मुद्दे या निवडणुकीत महत्त्वाचे ठरण्याची शक्यता आहे. अर्ज भरण्याच्या वेळी वंचित बहुजन आघाडीचे कार्यकर्ते आणि स्थानिक रहिवासी मोठ्या संख्येने उपस्थित होते.