हंगरगा (नळ): येथील भीम नगर भागात आज सकाळी प्रचारादरम्यान एक भावनिक प्रसंग पाहायला मिळाला. युवा नेतृत्व आशिष गणेश सोनटक्के यांनी भारतरत्न डॉ. बाबासाहेब आंबेडकर यांच्या संविधानाला साक्ष मानून, “गोरगरिबांची सेवा एकनिष्ठेने करेन,” अशी ग्वाही दिली. त्यांच्या या भूमिकेमुळे उपस्थित ग्रामस्थांची मने जिंकली असून, “गणेश दादांचा वारसा तूच पुढे नेशील,” असा आशीर्वाद यावेळी वडीलधाऱ्यांनी त्यांना दिला.
संविधानाची शपथ आणि जनसेवा: प्रचारासाठी भीम नगरमध्ये पोहोचलेल्या आशिष सोनटक्के यांचे स्थानिक नागरिकांनी उत्साहात स्वागत केले. यावेळी बोलताना आशिष यांनी स्पष्ट केले की, राजकारण हे केवळ सत्तेसाठी नसून ते वंचितांच्या न्यायासाठी आहे. संविधानाला साक्षी मानून त्यांनी शब्द दिला की, समाजातील शेवटच्या घटकाचे काम करण्यासाठी ते सदैव तत्पर राहतील. त्यांच्या या स्पष्टवक्तेपणामुळे आणि निष्ठेमुळे तरुणांसह ज्येष्ठांनीही त्यांना मोठा पाठिंबा दर्शवला.
प्रचाराला लागली शोककळा: प्रचार सुरू असतानाच, अचानक उपमुख्यमंत्री ‘अजित दादा’ यांच्या निधनाची दुःखद बातमी परिसरात धडकली. ही बातमी समजताच संपूर्ण हंगरगा गावावर शोककळा पसरली. आशिष सोनटक्के यांनी तातडीने आपला पुढील सर्व प्रचार दौरा स्थगित करण्याचा निर्णय घेतला.
श्रद्धांजली अर्पण: प्रचाराचे रूपांतर शोकसभेत झाले. आशिष सोनटक्के आणि उपस्थित सर्व कार्यकर्त्यांनी दोन मिनिटे मौन पाळून अजित दादांना भावपूर्ण श्रद्धांजली अर्पण केली. “अजित दादांच्या जाण्याने समाजाची मोठी हानी झाली आहे, अशा परिस्थितीत राजकारण बाजूला ठेवून त्यांच्या स्मृतीला अभिवादन करणे हे आपले पहिले कर्तव्य आहे,” असे आशिष यांनी यावेळी भावूक होत सांगितले.