सत्ताधाऱ्यांची गुंडगिरी आणि सत्तेची लाचारी! कचरू सगट यांना जीवे मारण्याचा कट रचणाऱ्यांना मातंग समाजाचा तुळजापुरातून थेट इशारा; “कॉलरला हात लावाल तर याद राखा!”

_{पैशाने माजलेल्या आणि गुंडगिरीच्या बळावर राजकारण करू पाहणाऱ्या सत्ताधाऱ्यांनी जनतेचा रोष ओळखावा. कचरू सगट यांच्या केसालाही धक्का लागला तर…}

तुळजापूर (अधिकार वार्ता प्रतिनिधी): सत्ता जेव्हा डोक्यात जाते, तेव्हा प्रस्थापित लोक गुंडगिरीवर उतरतात याचा प्रत्यय तुळजापुरात येत आहे. जिल्हा परिषद निवडणुकीत ५६८२ मते घेऊन सत्ताधाऱ्यांचे सिंहासन डळमळीत करणारे कचरू मल्हारी सगट यांच्या वाढत्या लोकप्रियतेने सत्ताधारी पक्ष इतका हादरला आहे की, आता त्यांनी थेट गुंडगिरीचा मार्ग अवलंबून एका सामान्य कुटुंबातील माणसाला जीवे मारण्याच्या धमक्या देण्यास सुरुवात केली आहे. या गुंडगिरीच्या विरोधात तुळजापुरात मातंग समाजाने वज्रमुठ आवळली असून, सत्ताधाऱ्यांच्या या दडपशाहीचा तीव्र निषेध केला आहे.

आमदाराच्या पोराची गुंडगिरी आणि सत्तेची मस्ती! “घराणेशाहीच्या जीवावर आणि बापाच्या खुर्चीचा वापर करून जो आमदाराचा पोरगा गुंडगिरीचा रुबाब दाखवत आहे, त्याने एक गोष्ट लक्षात ठेवावी—ही लोकशाही आहे, तुमची जहागिरी नाही!” अशा तिखट शब्दात तुळजापूरच्या पत्रकार परिषदेत कार्यकर्त्यांनी आपला संताप व्यक्त केला. केवळ आगामी आमदारकीच्या निवडणुकीत कचरू सगट हे आव्हान ठरतील, या भीतीने सत्ताधारी पक्षाने त्यांना संपवण्याचा कट रचल्याची माहिती समोर आली आहे. सामान्य कुटुंबातील माणसाने समाजासाठी काम करणे सत्ताधाऱ्यांच्या पचनी पडत नसल्यानेच ही गुंडगिरी फोफावली आहे.

सत्तेची लाचारी: खोटे गुन्हे आणि तडीपारीचा खेळ! स्वतःच्या अंगावर गुन्ह्यांचे ‘पोट’ घेऊन फिरणारे सत्ताधारी आज एका प्रामाणिक सामाजिक कार्यकर्त्यावर कारवाईची भाषा करत आहेत. कचरू सगट यांच्यावर खोटे गुन्हे दाखल करून त्यांना तडीपार करण्याची नोटीस काढणे, ही निव्वळ सत्तेची लाचारी आहे. सत्तेचा गैरवापर करून एका सर्वसामान्याचा आवाज दाबण्याचा जो प्रयत्न सुरू आहे, तो आता मातंग समाज खपवून घेणार नाही. “ज्यांचे हात रक्ताने माखलेले आहेत, तेच आज कायद्याच्या गप्पा मारत आहेत,” असा टोला यावेळी सत्ताधाऱ्यांना लगावण्यात आला.

चवताळलेला मातंग समाज तुमची घराणेशाही गाडल्याशिवाय राहणार नाही! “पत्रकार परिषदेत स्पष्ट शब्दात इशारा देण्यात आला की, “जर कचरू सगट यांच्या कॉलरला सुद्धा धक्का लागला, तर अख्खा महाराष्ट्रातील मातंग समाज चवताळून उठेल.” ही केवळ धमकी नसून, अन्याय सहन न करणाऱ्या एका मोठ्या समाजाचा एल्गार आहे. सामान्य कुटुंबातून येऊन सामाजिक न्याय आणि हक्कासाठी लढणाऱ्या सगट यांच्या पाठीशी समाज खंबीरपणे उभा असून, सत्ताधाऱ्यांच्या गुंडगिरीला आता जशास तसे उत्तर दिले जाईल.

“पैशाने माजलेल्या आणि गुंडगिरीच्या बळावर राजकारण करू पाहणाऱ्या सत्ताधाऱ्यांनी जनतेचा रोष ओळखावा. कचरू सगट यांच्या केसालाही धक्का लागला, तर हे आंदोलन संपूर्ण महाराष्ट्रभर वणव्यासारखे पसरेल आणि तुमची घराणेशाही धुळीस मिळाल्याशिवाय राहणार नाही!”

तुळजापुरातून निघालेली ही ठिणगी आता संपूर्ण राज्यात क्रांतीची मशाल बनणार असून, सत्ताधाऱ्यांच्या दडपशाहीचा अंत जवळ आल्याची चर्चा सध्या सर्वत्र रंगली आहे.